ما ني ناسي الافريقي في عينايا



خالد الهرماسي

هي جغرافيا هي 100 سنة تاريخ هي الحضارة هي الثقافة هي الفن هي الحركة الوطنية هي زناقي​ المدينة و بيبان البلاد العربي هي جامع الزيتونة و جامع الهوا و باب منارة و باب جديد و بطحاء معقل الزعيم و القصبة و المركاض​ و المر و سوق العصر و باب الدزيرة و باب جديد هي السيدة المنوبية و عزيزة عثمانة هي الأميرة عطف الحفصية هي الراشدية و سوق الشواشين هي إبن خلدون و الثعالبي و آل بن عاشور هي الحركة الوطنية حاربت الاستعمار هي الدم و الروح هي الغالية الي تزهينا و تبكينا هي في عينينا في قلوبنا و عقولنا هي ميش مجرد جمعية هي حالة عشق و هبلة​ هي عقلية هي شيخة هي دوخة هي الكل في الكل العالم كله يحكي عليها و على اللطخة متاع أولادها الي يموتو فيها دينار دينار لمو الميليارات​ بش تبرى الميمة و يخلص ربي وحلها الي خذا قرض و الي باع كرهبتو والي نحى من فلوس دواه و قوت صغاره​ ​ الي باعت ذهبها و الي و الي و الي بش تقوم الحنينة​ و ترجع الأيام الزينة و تزهى الدنيا​ و تحلى العيشة مع الميمة​ و نكملو المسيرة و وصية الأجداد الي زرعوها فينا بش تبقى الحكاية من جيل لجيل ما ني ناسي الإفريقي في عينيا....


إيه نعم الي نحكي عليها هي الإفريقي شكون ما يعرفش الإفريقي شكون ما زهتوش الإفريقي شكون ما بكتوش الإفريقي قالوا عليها كلام و كلام حكاو عليها حكايات و غناو عليها غنايات​ الجمعيات عندها جماهير الا الإفريقي عندها شعب الكرة تمرض كيف تمرض الإفريقي​ عتوڤة​ الشايبي فابيو​ اندري ناجي البياري رتيمة​ الرويسي​ السليمي​ النايلي​ باڤندا​ فريد مختار الشريف بلمين​ بوصبيع​ رضاء العزابي​ فريد عباس فؤاد المبزع عزوز الأصرم​ أسامي و أسامي بناو الإفريقي حجرة حجرة قالهم المعلم الشتالي لمة إدارة الإفريقي أقوى من مجلس وزاري​ الكلام عليها يطول و الف ليلة و ليلة ما يوفاش كي نقلكم عمر تعلم عوم يوفى الحديث ...

أصل الحكاية في كل كلامي على الإفريقي هو الأزمة الخطيرة التي يمر بها النادي الذي تعرض لأخطر عملية فساد و تبييض أموال في تاريخ الرياضة التونسية​ من أطراف استغلت الفراغ بعد الثورة و عبثت بتاريخ النادي اليوم أهم شيء هو إنقاذ الإفريقي​ حتى لا نبكي بعد اشهر على عرص المدينة الجمهور اللطخة وراء اللطخة من اجل الإنقاذ...

الآن ليس وقت الحساب وقت الإنقاذ لهذا على كبايريته​ الجمعية و قفة رجال و إنقاذ الإفريقي و تنظيف كل ملفاته مع الفيفا نهائيا ثم رفع الملف للقضاء لأن الإفريقي غدروه و سرقوه و قاموا بجرائم تبييض أموال باسمه ولا بد​ ان يحاسبوا مهما كانوا و أينما​ كانوا

الإفريقي يمرض لكن لا يموت



Commentaires


0 de 0 commentaires pour l'article 203532